Tuesday, October 24, 2006

أنتهى رمضان و حضرة المتهم طلع غير متهم



حضرة المتهم أبي كان أهم مسلسل بالنسبة لي في رمضان, أولا لأن توقيت عرضه كان ممتاز بالنسبة لي, و ثانيا لأنه بطولة مجموعة من العمالقة زي نور الشريف و أشرف عبد الغفور وسمير صبري و مها أبو عوف و معالي زايد و زيزي البدراوي, و كمان بعد ما تابعت أولى الحلقات كنت مذهولة - بدون مبالغة - من أداء الشباب, و ثالثا طبعا لأن كلمات المقدمة و النهاية - اللي كانت بتضيع في الاعلانات - من تأليف المتميز أحمد فؤاد نجم
و أهم من كل ده أن لأول مرة حد ينصف الشباب و يحمل الأباء جزء من الخطأ اللي أولادهم بيقعوا فيه, و ده طبعا كان المؤلف الجامد جدا محمد جلال عبد القوي أبو أحمد جلال عبد القوي اللي عمل دور أحمد دراز في المسلسل, شكرا جزيلا يا أستاذ محمد على فكرتك العبقرية و أنصافك لجيلنا اللي هو فعلا مظلوم ما بين العادات اللي اهله بتربيه عليها و المفاجأت اللي بيشوفها في المجتمع الخارجي, غصب عننا بنقع وسط متاهة مش عارفين مين الصح و مين الغلط و كلام مين اللي صح - أبهاتنا و لا المجتمع- و كمان اشكرك على شخصية هنا و اشكر طبعا الفنانة المبدعة اللي اسمها زينة و هي فعلا زينة البنات, أنا كنت بحبها من زمان مش بس علشان أدوارها الجميلة و قدراتها التمثيلية اللي بتطور يوم بعد التاني, لكن كمان علشان قلبها الطيب و الخير الكتير اللي هي بتعمله من غير ما تعرف حد بيه, دور هنا كان صدمة بالنسبة لي, لأنه لأول مرة ما يحملش البنت نتيجة غلطة واحد مفتري غرر بيها و لأول مرة يناقش موضوع الشرف على أنه شرف الأخلاق مش شرف الجسد, صحيح نهاية "هنا" كانت مأساوية, لكنها في الأول وفي الأخر ضحية, ضحية لمجتمع و ظروف ما تعرفش الرحمة بأي بنت مسكينة و ما عندهاش خبرة و لا قدرة على مجابهة الملابسات اللي بتحيرنا ما بين الصح اللي بيقولوا اهالينا و المفروض اللي بيحطوا فوق كتافنا المجتمع

ده غير طبعا أني عاوزة أتكلم عن نور الشريف بس بصراحة مش عارفة أقول أيه أكتر من اللي أتقال, يا جماعة الراجل ده من وجهة نظري فنان بمعنى الكلمة, فنان قوي جدا و متمكن جدا, مع اني لم أحب دوره و أداءه في فيلم عمارة يعقوبيان و على فكرة أنا بحب الفليلم ده جدا, و كمان لازم أشكر الفنانة الجميلة المخرجة ذات الذوق الراقي رباب حسين اللي سبق و أخرجت مسلسل الليل و أخره بطولة يحي الفخراني و نرمين الفقي, طبعا فاكرينه لأنه علامة لا يمكن تتنسي و حضرة المتهم أبي كمان علامة صعب ننساها, و بالتالي تكون رباب حسين كمان علامة مهمة في الدراما العربية و المصرية

المهم خلينا في موضوعنا, وصلنا لأهم نقطة المقدمة و النهاية اللي المفروض أنكم بتسمعوها دلوقتي على البلوج, الكلمات دي كلمات حبيب قلبي أحمد فؤاد نجم, كلمات حلوة قوي زي ما عودنا دايما, "نازل و أنا ماشي ع الشوك برجليه و أنت السبب يا أبى يا للي خليت بيه" .. بجد بجد الله عليك يا أبو النجوم و خصوصا الحتة اللي بتقول فيها "و أنا لما جيت م الغيب العدل كان كيفي و الحق كان مطمعي و الحب كان سيفي", أيه ده بس ؟ جايب الكلام ده منين؟ أنا حسيت أكنه مكتوب لي أنا و عني أنا لوحدي, عبرت عن معاناتنا كشباب الجيل الضايع بصدق و احساس رائع, ربنا يخليك لينا و يطول لنا في عمرك, حقيقي حقيقي أنا بحس بالفخر كل ما أفتكر أني بنتمي لمصر نفس البلد اللي واحد زيك أنت يا نجم طلع منها, أنا لو قعدت أتكلم عنك مش هيكفيني مليون بلوج, علشان كده هبطل كلام

و أخيرا, خلص رمضان و العيد بكرة و مش لاقية كلمة أختم بيها أحلى من: كل سنة و أنتم طيبين

داليا زيادة