المشكلة فيكم انتم مش في الشباب ال بيغني أغاني المهرجانات أو ال بيحبوا يسمعوها —
أنا أحياناً باسمعهم بحكم صديقي الصغير ذو الست سنوات ال بيحب أغانيهم، وبعض أغانيهم عجبتني برضه مش هانكر، لكن مش فاكرة اسم منهم وإلا والله كنت كتبته.
الفكرة بقى وال غايظاني ومضايقاني جداً هو بعض الناس المحترمين خصوصاً من الجيل ال أكبر من الشباب بشوية ونازلين تريقة وتهزيق في أغاني المهرجانات واللي بيغنوها واللي بيسمعوها، ومنصبين نفسهم حماة الفن في مصر، وهم نفسهم تلاقيهم معجبين أوي بواحد طالع يقول "دخلك منين سرسوب الهوى" علشان طلع لهم في كليب حلو ومصروف عليه من شركة انتاج كبيرة!!
شباب المهرجانات بقى ولا معاهم فلوس ولا وراهم شركات انتاج كبيرة، دول ناس بسيطة عندهم ثقافة مختلفة عنك ولها خصوصيتها واحترامها، وطلعوا يعبروا عن ثقافتهم بطريقتهم (ال مختلفة طبعاً عن القالب العتيق ال في دماغ سيادتك) ولقوا جمهور يستجيب لطريقة التعبير دي ويتفاعل معاها، عادي يعني، ومش من حقك تحكم عليهم ولا تحاكمهم ولا تفرض عليهم صورة في دماغك عن كيف تكون الأغنية والمغني.
احنا ١٠٠ مليون، فينا ال بيسمع أم كلثوم وهاني شاكر وال بيسمع عمرو دياب وحماقي وال بيسمع موتزارت وال بيسمع انترناشيونال وال بيسمع لبناني وال بيسمع خليجي وال بيسمع مهرجانات... عادي جداً!!
المشكلة فيكم انتم وفي عقدكم وفي عدم تقبلكم لأي شيء مختلف عن ال حافظينه وحب المنظرة وإصدار الأحكام على الغير علشان تحسوا انكم أحسن منهم، المشكلة فيكم ومش في الشباب ال بيغني أغاني المهرجانات أو ال بيحبوا يسمعوها.