لما المطر بطل ينقط
داليا زيادة
لما المطر بطل ينقط
فوق سطوح بيتنا القديم
حاجات كتير بطلتها
بطلت فوق الحيط أشخبط
بلون سحابة شايلة غيم
و لون قمر يشبه لها
بطلت م الكسوف اتلخبط
لما ألاقي واد وسيم
يغمز لصاحبه بحبها
لما المطر بطل ينقط
فتحت فتحة صغيرة
و خرجت منها
خرجت أتعلم حاجات
ما كنتش أعرفها ساعتها
عرفت مثلا إن الولاد
مش طيبين في كل وقت
و كمان عرفت إن البنات
مش كلها بتحب بعض
و عرفت إن الكون ده أصله
ولد و بنت
بصراحة لما عرفت خوفت
و قوام على بيتنا رجعت
رجع المطر تاني ينقط
فوق سطوح بيتنا القديم
و من فتحة كنت فتحتها
عشان أطل هناك و أشوف
اتسرسبت حبة مطر
فوق الحيطان
مسحت لي رسمة رسمتها
هناك زمان
مسحت كسوفي م الولاد
مسحت لي ضحكي مع البنات
مسحت لي طيبة قلب مات
و سابت لي خوفي