باسم شرف .. ممكن تلاقيه ممثل أو مخرج أو مؤلف مسرحي زي مجموعته المسرحيه جزمة واحدة مليئة بالأحداث, و ممكن كمان تلاقيه كاتب سيناريو سيت كوم زي مسلسل تامر و شوقية أو كاتب كوميكس زي اللي بتتنشر في جريدة الدستور و غيرها, و المشكلة أن عنده قدره على الإبداع و التجديد بشكل غير عادي, مش غاوي تقليد لكنه رائد تجديد
باسم .. ده إنسان مجنون من ولاد مصر و فخر ليها بلا أدنى شك, واحد من القليلين جدا اللي يقدروا يتحدوا الصعب و يثوروا على الأوضاع المخزية اللي بتكرر بشكل يومي في حياتنا – أنا شخصيا نفسي أقدر اعمل كده زيه – لكن في نفس الوقت من غير ما يحقق أي خساير لنفسه أو اللي حواليه, يعني من الأخر نقدر نقول أنه عاقل برده, أو بمعنى أدق باسم فنان "مجنون بعقل", و علشان كده أنا اهدي له المقطع الأول من القصيدة اللي شخصيته الغريبة و تصرفاته المجنونة ألهمتني بكتابتها على الرغم من أني اعرفه من وقت قريب قوي, هو بيقول إن القصيدة كده مكتملة, لكن مش عارفة ليه حاسة إنها ناقصة
واحد رزين مجنون
لكن مجنون بعقل
غاوي في حياته الصعب
و ناسي البسيط و السهل
و في عز الجنان تلاقيه
ماشي الطريق على مهل
حاله غريب و الدنيا
بتساوي عنده صفر
عايشها زي ما هو
عايز يعيشها و بس
و لاهمه مين مش داري
و لا همه مين بيحس
.......................
لسه ما خلصتش
داليا زيادة
